《教子逆君皇》任劍輝、吳君麗、陳寶珠

1960年，僅13歲的寶珠與任姐首部合拍的電影《教子逆君皇》，寶珠演來爽朗，活潑精伶，唸白唱做打俱佳，想定逗得任姐十分開心了。
故事大綱：



宮女林小環與世鑾太子相戀，珠胎暗結，被國太發現，驅逐出宮鑾過邦睦鄰遭軟禁，番王並逼鑾娶其女，鑾無奈答允。鑾被番邦大軍押送回國登基，途中小環抱新生子環兒迎駕，鑾不敢相認......
十二年後，鑾打獵山中，巧遇環兒，父子相逢不相識。鑾見環武藝超群，欲收為國用......
小環痛恨鑾當日抛妻棄子，教環兒叛逆君皇，環兒在金殿上諷刺群臣，戲弄番邦公主，又趁機要求鑾召小環上殿.......
鑾終與小環母子相認，並封小環為東宮，自此發憤圖強，不再為外邦所侮。
＊＊
教子逆君皇。父母初遇



環兒：盤馬開弓　將雁打
環兒：真笑話　估唔到你地咁差　畀我一拳一腳
　　　打到你地四腳爬爬　吓　啊公教我嘅功夫
　　　的確係駛得吓噃　右打順德公扒龍船
　　　最好就係呢度淺水摸蝦　喂　你快將雙雁交還
　　　就算你一場造化　若果唔係吖　你因住呀　我就出埋呢路
　　　燒火佬剷煤渣　
世鑾：哎呀
環兒：剷到你地甩手甩腳甩下扒
世鑾：細蚊仔　你咪個咁口誇　孤皇大量唔將你根查　我恕你無知
　　　恕你未入教化咋噃　本來你得罪咗皇帝呀　虱乸都要擔枷
環兒：喂　你唔畀返對雁兒　我連你都打噃
世鑾：哎呀
環兒：唔怕你地人多　就想夾硬扒
世鑾：喂　呢對雁兒分明係孤皇射下架噃　來啦來啦
　　　賜你白銀五兩　咪個响處咁唎喇
環兒：多多錢都唔要　一箭雙鵰　唔通你射啩　
　　　箭桿上有我環兒名字　請你一查
世鑾：林環兒　林環兒　哈哈
　　　此子箭法確係堪誇　況且武藝超群　真係出神入化　
　　　可笑四名大將　都被佢打到依牙　哈哈
　　　想我自番邦招親　從此受人壓榨　
　　　事無大小　都要問過公主嘅外家
　　　我呢個皇帝孤掌難鳴　想起真正係丟架　
　　　唉　江山半壁　國事都亂如麻
　　　武將與文臣　個個都心存懼怕　終日素餐尸位　就不理其他
　　　不若收佢在朝中　來伴駕
　　　叫一句小英雄　你武藝確堪誇　
　　　一箭能射雙雁　啲箭法重好過孤家　　　
環兒：駛乜你讚我　分明係跌倒拿渣沙　畀返對雁我　我立即要回家
世鑾：英雄你慢走　請問邊一個係你亞爸呀
環兒：我個衰鬼老豆呀　早就死咗啦
世鑾：咁邊個養大你架
環兒：我亞媽咯
世鑾：邊個教你啲功夫仔呢
環兒：亞公自小教我紮馬
世鑾：哦　咁你亞媽呢
環兒：家中織布兼織麻　乜你咁長氣架　問長問短佐住我歸家
世鑾：我想帶你入朝做大官　帶協你亞媽
環兒：大官我唔識做　點似山中將雁打
世鑾：若果入朝伴孤皇
環兒：點呀
世鑾：做官就好聲架　出入在皇城　騎大馬
環兒：騎大馬呀　真係好耍啦　出入皇城我誇啦啦　你話得出時
　　　要做得到　快啲畀嚟啦
世鑾：天真可愛笑煞孤家　恩賜你一面金牌　明朝上朝伴駕
環兒：你畀呢個金牌我有咩用呀　又話叫我騎大馬
世鑾：想騎大馬呀嘛　容乜易呢　你有咗呢個金牌　
環兒：點呀
世鑾：想乜嘢都得架嘞　就算文武百官　見到你都要下拜架啦　
　　　因為呢個金牌呢　即係代表孤家架
環兒：嘩係　咁架勢架
世鑾：係頂啦
環兒：咁我不妨去試下啦　喂　睇下
　　　阿　真係個個都跪著我　哈哈哈　
　　　真係好笑　一隻二隻好似大青蛙呀
世鑾：哈哈哈　呢啲就係孤皇賜畀你嘅光榮啦
　　　以後　你要保國忠君　要聽孤皇嘅說話架
環兒：吓　又要聽你話　又要保國忠君呀
　　　咁　我返去問過亞媽啦
　　　喂　拎返隻雁來
完～

主演：任劍輝［世鑾太子］
　　　吳君麗［林小環］
　　　譚蘭卿［皇后］
　　　半日安［國太］
　　　靚次伯［林耀榮］
　　　陳寶珠［林環兒］
　　　任冰兒［番邦公主］
　　　麥先聲［張佩光］
　　　劉少文［番邦元帥］
　　　張　生［唐三］
　　　張醒非［番王］
　　　尹靈光［太監］
導演：羅志雄
製作：大成影片公司
人生百味＠戲曲

《 帝女花。香夭》經典詩白及唱詞

經典詩白及唱詞《帝女花。香夭》1959年電影版本片段

帝女花嘅辭藻瑰麗典雅，戲中《香夭》一節嘅詩白同唱詞情景交融，係成個劇本嘅精華之處。多數嶺南地區嘅人同埋懂得粵劇嘅海外華僑都識得唱出呢一節；另外，唔係特別鍾愛或者通曉粵劇唱法嘅年青人亦都懂得唱出呢一段，即反映出《香夭》唱詞係好深入民心。

詩白：［1959年版］

旦：倚殿陰森奇樹雙，
生：當年誓約未能忘。［明珠萬顆映花黃］
旦：舊臣目對花燭夜，［如此斷腸花燭夜］
生：不須侍女伴身旁，
　　下去。
侍：知道。
唱詞：
旦：落花滿天蔽月光，借一杯附薦鳳台上。
旦：帝女花帶淚上香，願喪生回謝爹娘。
旦：我偷偷看、偷偷望，佢帶淚帶淚暗悲傷。
旦：我半帶驚惶，怕駙馬惜鸞鳳配，不甘殉愛伴我臨泉壤。
生：寸心盼望能同合葬；鴛鴦侶，相偎傍。
生：泉台上再設新房，地府陰司裏再覓那平陽門巷。
旦：唉，惜花者甘殉葬。花燭夜，難為駙馬飲砒霜。
生：江山悲災劫。感先帝，恩千丈；與妻雙雙叩問帝安。
旦：唉，盼得花燭共諧白髮，誰個願看花燭翻血浪。
旦：唉，我誤君累你同埋孽網，好應盡禮揖花燭深深拜。
旦：再合巹交杯，墓穴作新房，待千秋歌讚註駙馬在靈牌上
生：將柳陰當做芙蓉帳，明朝駙馬看新娘，夜半挑燈有心作窺妝。
旦：地老天荒，情鳳永配痴凰，願與夫婿共拜相交杯舉案。
生：遞過金杯慢咽輕嘗，將砒霜帶淚放落葡萄上。
唱詞：
旦：合歡與君醉夢鄉，
生：碰杯夢到夜台上。
旦：百花冠替代殮妝，
生：駙馬珈墳墓收藏。
生：相擁抱，
旦：相偎傍，
合：雙枝柳樹透露帝女香。
生：帝女花，
旦：長伴有心郎；
合：夫妻死去樹也同模樣。


編：唐滌生．1957年



《帝女花》故事：

明朝崇禎末年內憂外患益重，然長平公主自恃才高，尚未覓得駙馬。大臣周鍾引領周世顯進見，以佢嘅言詞同誠意成功打動長平。崇禎即賜封世顯為駙馬，兩人尚未成婚，闖賊已經攻陷皇城。崇禎賜死皇后同眾妃，仲胖劍刺傷長平。周鍾救走公主，長平喺悉心照料下日漸康復。周鍾同寶倫欲將長平獻畀清帝來謀求官祿，長平得周瑞蘭巧計幫助隱居維摩庵。

一年之後，世顯喺庵外偶見長平，幾經哀求至到世顯欲以身殉，長平先至肯相認。世顯坦告長平假意降清之計，公主含淚寫表，要求清帝厚葬崇禎同釋放太子。清帝為咗撫平明朝遺臣，終於被逼實踐諾言。最後公主同駙馬喺含樟樹旁邊拜堂，仲雙雙仰藥殉國。呢個時候天上傳來歌聲，迎接金童同玉女返回天庭。周鍾同寶倫慚愧非常，請求罷官回鄉。

《香夭》係《帝女花》嘅第七場，亦係最後一場。

長平公主同駙馬周世顯喺花燭夜飲下毒酒雙雙殉國。呢場戲係用一段詩白開始，介紹場景同兩人嘅心情，然後用一首小曲［妝台秋思］將兩人嘅處境描述得淋漓盡致。


《帝女花》曾經兩次拍攝成粵劇電影。
第一次拍成電影係喺1959年6月30日上映嘅《帝女花》，由［仙鳳鳴劇團］老倌主演。

演：任劍輝（飾）周世顯
　　白雪仙（飾）長平公主
　　英麗梨（飾）昭仁公主
　　靚次伯（飾）崇禎皇帝
　　歐陽儉（飾）周　鍾
　　蕭仲坤（飾）周寶倫
　　陳好逑（飾）周瑞蘭
　　馬笑英（飾）周皇后
　　梁淑卿（飾）秦道姑
　　陸飛鴻（飾）清欽差
　　陳皮梅（飾）王　母

編劇：唐滌生．1957年
導演：龍　圖．1959年
　　　左　几．執行　

第二次係喺1976年拍成嘅《帝女花》電影，由［雛鳳鳴劇團］台柱老倌主演。

演：龍劍笙（飾演）周世顯
　　梅雪詩（飾演）長平公主
　　靚次伯（飾演）崇禎皇帝／清帝
　　梁醒波（飾演）周　鍾
　　朱劍丹（飾演）周寶倫
　　江雪鷺（飾演）周瑞蘭
　　言雪芬（飾演）周皇后

編劇：唐滌生．1957年
執導：吳宇森．1976年
編曲：顧家輝

＊＊

人生百味＠戲曲